ქუთაისში არსებულ მრავალ სიმბოლოს და ძეგლს სავარაუდოდ, კიდევ ახალი ქანდაკება შეემატება. ქუთაისის მერიამ ტენდერი უკვე გამოაცხადა ქალის ნატურალური ზომის ქანდაკების დამზადებასთან დაკავშირებით. ხსენებული ძეგლი თეთრი ხიდის ტერიტორიაზე დაიდგმება და ორ მაისს საზეიმოდ გაიხსნება.
ქუთაისი თავისი სახელობის დღესასწაულს „ქუთაისობას" ახალი ძეგლის აღმართვითაც აღნიშნავს. ძეგლის, რომელიც გარკვეულწილად „გვირილობის" დღესასწაულის დამფუძნებელ ქუთაისელ ქალბატონს საშა ჩიქოვანს და მის თანამოაზრე გიმნაზიელ გოგონებს დაუკავშირდება. „გვირილოსნები" ტუბერკულოზით დაავადებულებს უგროვებდნენ თანხებს, ყველა ქველმოქმედს კი მადლიერების ნიშნად მკერდზე გვირილებს უმაგრებდნენ. აქციამ თანდათან მასობრივი ხასიათი მიიღო და საზეიმო მსვლელობაში გადაიზარდა. იმ ზეიმის სახე მიიღო, რომელსაც დღეს „ორმაისობისა" და „ქუთაის ქალაქობის" სახელით ვიცნობთ. თუმცა, აქამდე არ ვიცნობდით ძეგლს ამ დღესასწაულთან დაკავშირებით. ორ მაისს ქუთაისელები ახლადრესტავრირებულ მესხიშვილის თეატრსა და ქალაქის ცენტრში აღმართულ შადრევანთან ერთად, თავისი ქალაქის სიმბოლოსაც იხილავს. სწორედ სიმბოლოს! რადგან, თუკი „გვირილობა" და „ქუთაისობა" ერთი და იგივეა, მაშინ „გვირილობის" სიმბოლო - ქალის ქანდაკება - ქალაქის სიმბოლოდაც შეიძლება მივიჩნიოთ, ანუ ქუთაისის სიმბოლო ქალი იქნება. ამით შეირყევა მითი ქუთაისის მამაქალაქობაზე და მის „მასკულინურ საწყისზე". ქუთაისს ქალი წარადგენს, თანაც არც ხმლით, ან ცელით, არამედ სავარაუდოდ, გვირილით ხელში.
ქალის ფიგურის ქანდაკებისთვის ადგილობრივი ბიუჯეტიდან 28 670 ლარია გამოყოფილი. შემსრულებლის ვინაობა მიმდინარე წლის 4 აპრილს უნდა გაირკვეს.
ეკა კუხალაშვილი
No comments:
Post a Comment