წყალტუბოში მცხოვრები სოციალურად დაუცველი 78 წლის ვარლამ კილაძე სასწრაფო ოპერაციას საჭიროებს. სადაზღვევო პაკეტით განკუთვნილი დახმარების მიუხედავად, სიღარიბის ზღვარს ქვემოთ მყოფ პირს ოპერაციას დღემდე არ უფინანსებენ. გადაუდებელი ოპერაციის საჭიროების მქონე ბენეფიციარი 4 თვეა, მოლოდინის რეჟიმში ცხოვრობს.
,,ბაბუაჩემი გულით ავადმყოფია, მისი მდგომარეობა ყოველდღე უფრო მძიმდება. ყოველდღიურ რეჟიმში ველოდები როდის დაუფინანსებენ ოპერაციას, რომელიც მისთვის სასიცოცხლოდ მნიშვნელოვანია," - ამბობს პაციენტის შვილიშვილი ლანა არველაძე.
ვარლამ კილაძის ოჯახის წევრების თქმით, გულის პრობლემები და მოციმციმე არითმია პაციენტს მეხუთე წელია აწუხებს. სხვადასხვა ექიმთან მკურნალობისა, თუ კონსულტაციების მიუხედავად, ბოლო დროს მდგომარეობა უფრო გამწვავდა და პაციენტმა ქუთაისის ინტერვენციული მედიცინის ეროვნულ ცენტრს მიმართა. აღნიშნულ ცენტრში გამოკვლევებისა და ანალიზების საფუძველზე პაციენტს დაუდგინეს, რომ სასწრაფო ქირურგიულ ჩარევასა და გულის სარქველების პროტეზირებას უსწრაფეს ვადებში საჭიროებს.
დიაგნოზის დასმის შემდეგ, ვარლამ კილაძეს აღნიშნულ სამედიცინო ცენტრში ე. წ „კორონაროგრაფია" - (აპარატული გამოკვლევა) ჩაუტარდა. გამოკვლევისთვის საჭირო თანხები პაციენტმა თავად დაფარა.
,,ჯანმრთელობის მდგომარეობის საერთო ცნობისათვის სესხად აღებული 1500 ლარი იმ იმედით დავხარჯეთ, რომ უტყუარი დოკუმენტაციის საფუძველზე ,,ალდაგი" მალევე დააფინანსებდა სასიცოცხლო მნიშვნელობის ოპერაციას. შედეგი კი მერამდენე თვეა მხოლოდ დახარჯული ფული, მდგომარეობის გაუარესება და განუხორციელებელი ოპერაციაა," - ამბობს პაციენტის მეუღლე ციალა გაბუნია.
ცნობა პაციენტის მდგომარეობის შესახებ დასავლეთ საქართველოს ინტერვენციული მედიცინის ცენტრიდან სადაზღვევო კომპანია „ალდაგი ბისიაი"-ში ვარლამ კილაძის ოჯახის წევრებმა ოთხი თვის წინ წარადგინეს. თუმცა, დაფინანსების შესახებ პასუხი დღემდე არ მიუღიათ.
,,მაინტერესებს წელიწადი თუ ოპერაციას მდგომარეობის გართულებით ვუცადე, როდესაც სასწრაფო დახმარებას ვსაჭიროებ, რაღა ავადმყოფი ვყოფილვარ მაშინ? თანაც ვშიშობ, რადგან ყოველდღე უარესად ვხდები," - ამბობს ვარლამ კილაძე
დასავლეთ საქართველოს ინტერვენციული სამედიცინო ცენტრის კარდიოლოგიური სამსახურის უფროსი, პროფესორი კახა ბესელია „ახალ გაზეთთან" საუბარში აღნიშნავს, რომ სადაზღვევო კომპანიები ყველა საოპერაციო შემთხვევის ერთდროულად დაფინანსებას ვერ ახერხებენ და ამ მხრივ საკმაოდ რთული სიტუაციაა.
,,პაციენტთა გაზრდილი საოპერაციო რიგები არასაკმარისი საბიუჯეტო თანხებია. რადგან, როგორც ვიცი, არსებობს ე. წ. თვიური კვოტები, რომლის ზევით უკვე ვეღარ ხერხდება ოპერაციების დაფინანსება," - ამბობს კახა ბესელია.
სადაღვევო კომპანია „ალდაგი ბისიაი"-ს მიერ მოწოდებული ინფორმაციით, ოპერაციები ორ ჯგუფად იყოფა: გეგმიური და გადაუდებელი სახის ოპერაციებად. მოცდის რეჟიმი კი მხოლოდ ურგენტული ჩვენების პაციენტებზე არ ვრცელდება. სადაზღვევო კომპანიაში აცხადებენ, რომ ვარლამ კილაძის ოპერაცია გეგმიურ ოპერაციად არის მიჩნეული, რომელიც 6-თვიანი მოცდის რეჟიმშია ჩასმული.
პაციენტის სირთულის ხარისხის შესახებ განსხვავებულ ინფორმაცია ფიქსირდება 2011 წლის 28 ნოემბერს ინტერვენციული მედიცინის ცენტრიდან გაცემულ ცნობაში: „ავადმყოფის მიმდინარეობა გახლავთ ქრონიკული. ესაჭიროება ქირურგიული მკურნალობა მიტრალური და სამკარიანი სარქველების პროტეზირება მინიმალურად მოკლე ვადაში."
ცნობასთან ერთად დართულ ანგარიშფაქტურაში დასაფინანსებელი ოპერაციისთვის საჭირო თანხად მითითებული 14 300 ლარია.
დასავლეთ საქართველოს ინტერვენციული სამედიცინო ცენტრის კარდიოლოგიური სამსახურის უფროსი, პროფესორი კახა ბესელია ამბობს, რომ სასწრაფო ოპერაციის საჭიროების შემთხვევაში, დაფინანსების მომლოდინე რეჟიმში მყოფ პაციენტის დაგვიანებულმა დახმარებამ შეიძლება მდგომარეობა არამხოლოდ გაურთულოს, არამედ სასიცოცხლო რისკებამდეც მიიყვანოს.
,,როდესაც ჯანმრთელობის მდგომარეობა გართულებულია, დაგვიანებული ჩარევა უკვე გარკვეულ რისკებს უკავშირდება. დრო ყველაზე მთავარი ფაქტორია. სწორედ დროული ჩარევა განსაზღვრავს ოპერაციის ჯერ რისკსა და მერე რეზულტატს," - ამბობს კახა ბესელია.
ანა ჯანაშია
No comments:
Post a Comment