ქუთაისის მერის გიორგი თევდორაძის თანხმობის გარეშე მერიის სამსახურების უფროსები მედიასთან კომენტარს აღარ აკეთებენ. უკვე რამდენიმე კვირაა ჟურნალისტებს ინტერვიუების ჩაწერა მას შემდეგ უხდებათ, რაც პრესსამსახურის წარმომადგენლები ქალაქის მერთან საკითხებს შეათანხმებენ. როგორც სხვადასხვა უწყების წარმომადგენლები ჟურნალისტებთან პირად საუბარში აცხადებენ, ისინი მკაცრად არიან გაფრთხილებულნი, რომ მერის ნებართვის გარეშე, მერიიდან არანაირი ინფორმაცია არ გავიდეს.
აღნიშნული დირექტივის გამო, პროფესიული საქმიანობის განხორციელების დროს პრობლემები „ახალი გაზეთის" ჟურნალისტებს არაერთხელ შეექმნათ. „ახალი გაზეთის" ჟურნალისტი თეკლა მორგოშია იხსენებს ბოლო პერიოდში მერიაში განვითარებულ მოვლენებს, როდესაც ამა თუ იმ საკითხზე კომენტარის მისაღებად პრესსამსახურის წარმომადგენელი შესათანხმებლად მერთან შევიდა. „პრესსამსახური ქალაქის მერთან მიდის საკითხების შესათანხმებლად. ქალაქის პირველი პირი მკაცრად აკონტროლებს სამსახურების ურთიერთობის საკითხებს მედიასთან," - ამბობს ჟურნალისტი თეკლა მორგოშია. მორგოშია რამდენიმე ინციდენტსაც იხსენებს, რის გამოც მას საგაზეთო მასალის მომზადების დროს ხელი შეეშალა. „ვამზადებდი საგაზეთო სტატიას. აღნიშნული თემა მერიის არქიტექტურის სამსახურის კომპეტენციაში შედიოდა. შესაბამისად, მივმართე პრესსამსახურს, რათა ჩამეწერა სამსახურის უფროსი. თუმცა, პრესსამსახურის უფროსმა ქეთი დეისაძემ საკითხის შესათანხმებლად მერს მიმართა. მერის კაბინეტიდან გამოსულმა პრესსამსახურის წარმომადგენელმა მითხრა, რომ სამსახურის ხელმძღვანელს ვერ ჩავწერდი კიდევ 2 დღის მანძილზე, რადგან ის ადგილზე არ იმყოფებოდა. თუკი ქალაქის მერმა თანხმობა არ გასცა, არავინ კომენტარს არ აკეთებს," - ამბობს თეკლა მორგოშია.
„ახალი გაზეთის" ჟურნალისტის ქრისტინა ქარჩხაძის თქმით, ქუთაისის მერიიდან მისაღები ინფორმაციის ოპერატიულობის ხარისხი ძალიან დაბალია. „რამდენიმე შემთხვევა მქონდა, როდესაც ქეთი დეისაძეს ვთხოვე საკითხის შეთანხმება, თუმცა ორშაბათს შეთანხმებული მასალა კვირის ბოლომდე არ მომაწოდეს. ასევე, პრაქტიკულად წარმოუდგენელია მერიის იმ ჩინოვნიკების ჩაწერა პრესსამსახურის ნებართვის გარეშე, რომლებიც აქამდე ნებართვის გარეშეც გვეწერებოდნენ. ახლა აცხადებენ, რომ ამგვარი დირექტივა აქვთ მიღებული. საინტერესოა, თუ პრესსამსახურმა და ქალაქის მერმა უნდა გადაწყვიტონ რა თქვას ამა თუ იმ სამსახურის უფროსმა, მაშინ რა საჭიროა მერიაში სხვადასხვა სამსახური?" - ამბობს ქრისტინა ქარჩხაძე.
ანალოგიური პრობლემები აქვთ გაზეთ „P.S." ჟურნალისტებსაც. „მერიის უწყებებიდან ინფორმაციის გამოტანა ქუთაისში გარკვეულწილად გმირობის ტოლფასად იქცა. მაშინ როცა, დღავანდელ დღეს, ჟურნალისტიკაში ოპერატიულობა მნიშვნელოვანია, ყოველი წამი გადამწყვეტია. ჟურნალისტებს კონკრეტული რესპონდენტის ჩასაწერად რამდენიმე „მარტივი" პროცედურის გავლა გვიწევს: მერის პრესსამსახურს უნდა ვუთხრათ ვისი ჩაწერა გვსურს და რა თემაზე, შემდეგ ცოტა ხანი უნდა დაელოდო, ალბათ, სანამ მერი გაიგებს დეტალებს და ამის შემდეგ, ზარი ხორციელდება კონკრეტულ პიროვნებასთან, რომ ჟურნალისტი მოდის და ხომ იცი…"რაც უნდა ისაუბროო". შემდეგ კი უკვე ჩვენთვისაც გზა ხსნილია და მივდივართ რესპონდენტის ჩასაწერად", - ამბობს გაზეთ „ P.S."-ის ჟურნალისტი ირაკლი ვაჩიბერაძე.
ადგილობრივ თვითმმართველობაში მედიის მიმართ მსგავს დამოკიდებულებას უარყოფენ და აქცენტს ურთიერთთანამშრომლობაზე აკეთბენ. „ურთიერთთანამშრომლობის ხასიათი აქვს ჩვენს ურთიერთობას. ვერ ვიხსენებ ისეთ ფაქტს, როდესაც ჟურნალისტი მერიიდან კომენტარის გარეშე წასულა. არის საკითხები, თემები, რომელსაც კონსულტაციის სახით სამსახურის უფროსებთან გავდივარ, ან ხშირ შემთხვევაში ქალაქის მერთან. ეს არ არის ზეწოლა ან შეზღუდვა," - ამბობს ქუთაისის მერიის საზოგადოებასთან ურთიერთობის სამსახურის მთავარი სპეციალისტი ქეთი დეისაძე.
თეო ხარაბაძე
No comments:
Post a Comment