ქუთაისის ცენტრში, შადრევანის მშენებლობისას წარმოებული გათხრების დროს, მშენებლები ისტორიული ნაგებობების ნაშთებს გადაეყარნენ. გავრცელებული ინფორმაციით, აღმოჩენილი იყო სამარხი, წმინდანის ნეშთით. თუმცა ჩვენს მიერ მოკვლეული ინფორმაციის საფუძველზე, ეს ფაქტი არ დადასტურდა. გაირკვა, რომ ქალაქის ცენტრში მშენებლებმა კულტურულ ფენას მიაკვლიეს. მათ მუშაობის პროცესში მე18-მე-19 საუკუნეების სოფლური და ქალაქური ტიპის დასახლებების ნაშთები აღმოაჩინეს.
სახელმწიფო ისტორიული მუზეუმის დირექტორის, ისტორიკოსისა და არქეოლოგის ომარ ლანჩავას ინფორმაციით, ამ ტერიტორიას მე-18 საუკუნეში, სოფლის ტიპის დასახლება იკავებდა, სადაც შენობების ძირითად მასალას ხე წარმოადგენდა. ისტორიკოსთა დასკვნით, ეს დასახლება ხანძრის შემდეგ განადგურდა. მე-19 საუკუნიდან ამავე ტერიტორიაზე ქალაქური ტიპის კაპიტალური შენობები გაჩნდა, რომლის ტიპიურ მაგალითს წარმოადგენს ისტორიული მუზეუმის ყოფილი შენობა, რომელიც იმ პერიოდისაა. თუმცა მთავარი ნაგებობა, რომელიც ამ ტერიტორიაზე იყო განთავსებული, „სობორო" გახლდათ. „სობორო" სიდიდით თითქმის ბაგრატის ტაძარს უტოლდებოდა. ხსენებული ძეგლი „ბოლშევიკებმა" დაანგრიეს 1923 წელს საქართველოს გასაბჭოების შემდეგ.
ცენტრალურ მოედანზე შადრევანის მშენებლობისას, გათხრების დროს მშენებლები სწორედ ამ ტაძრის საძირკველს გადაეყარნენ. თუმცა, ამ აღმოჩენას მშენებლობა არ შეუფერხებია. ომარ ლანჩავას თქმით, ხსენებული აღმოჩენა არ არის ისტორიკოსებისთვის სიახლის შემცველი და არც შენობების ეს ნაშთები წარმოადგენენ რაიმე განსაკუთრებულ კულტურულ, ან ისტორიულ ღირებულებას.
ეკა კუხალაშვილი
No comments:
Post a Comment