ადგილობრივი თვითმმართველობის არჩევნები - ეს იყო მთავარი, რაც 2010 წელს მოხდა. ბუნებრივია, ყველა მედია საშუალებისთვის, განსაკუთრებით კი რეგიონული გაზეთისთვის ადგილობრივი თვითმმართველობის არჩევნები არის ძალზედ მნიშვნელოვანი, რადგანაც მხოლოდ რეალური თვითმმართველობის პირობებში შეუძლია ხალხს მართოს თავისი ქალაქი და ჩაერთოს ხელისუფლების მხრიდან გადაწყვეტილების მიღების პროცესში. მაგრამ ვიდრე საზოგადოება არჩევანს გააკეთებს, მან უნდა იცოდეს, რაც შეიძლება მეტი თავად წინასაარჩევნო პროცესისა და საარჩევნო სუბიექტების შესახებ. "ახალი გაზეთი" იმერეთის მასშტაბით ერთადერთი გაზეთი იყო, რომელმაც USAID-ის ფინანსური მხარდაჭერით განახორციელა პროექტი "ინფორმირებული არჩევანი". პროექტის ფარგლებში, "ახალი გაზეთი" 2 თვის მანძილზე აქტიურად აშუქებდა წინასაარჩევნო პროცესსა და თანაბარ ადგილს სთავაზობდა ყველა საარჩევნო სუბიექტს საკუთარი პროგრამებისა და პოზიციების გამოსახატავად. გარდა ამისა, თავად არჩევნების დღეს, "ახალი გაზეთის" ჟურნალისტები მონიტორინგს ახორციელებდნენ მთელი ოლქის მასშტაბით. ხოლო ფოტო და აუდიო მასალა დაუყოვნებლივ იტვირთებოდა სპეციალურ ბლოგზე: www.archevani2010.blogspot.com.
ბლოგი ვახსენე და ორი სიტყვა, ახალი მედიის განვითარების ტენდენციებზეც უნდა ვთქვა. სოციალური მედია და ახალი მედია, სწორედ 2010 წელს გახდა პოპულარული. იგი თანდათან პოპულარული ხდება საქართველოშიც. "ახალი გაზეთი" სწორედ ერთ-ერთი პირველი ბეჭდვური გამოცემა გახლდათ, რომელმაც ფეხი აუწყო თანამედროვე მსოფლიო ტენდენციებს და საკუთარი მკითხველი უკვე ვირტუალურ სამყაროში (ონლაინ სივრცეშიც) გაიჩინა. დღეს უკვე "ახალი გაზეთის" ჟურნალისტების მიერ მომზადებული პუბლიკაციები მსოფლიოს ნებისმიერ წერტილში მყოფ ადამიანს შეუძლია წაიკითხოს. თანაც, არა მხოლოდ ბეჭდვური ვერსია, არამედ ფოტო და ვიდეო მასალაც იხილოს ამ ბლოგზე. ეს არის უნიკალური შესაძლებლობა, რომელიც გაზეთებს ელექტრონული მედიის კონკურენციის შესაძლებლობას აძლევს.
ამ მიმართულებით, საქართველოში ევროკავშირის მხარდაჭერით, მსოფლიო პრესის ასოციაცია (WAN-IFRA) და აირექს-ევროპა "საქართველოს მედიის ხელშემწყობ პროგრამას" (MSPG) ახორციელებენ, რომლის ერთ-ერთი კომპონენტი სწორედ "ახალი მედია პლატფორმების შექმნა და განვითარებაა". ამ კომპონენტში, კონკურსის საფუძველზე, საქართველოს მასშტაბით 12 მედია საშუალება შეირჩა, რომელთაგან ერთ-ერთი სწორედ "ახალი გაზეთი" გახლავთ. ამავე პროგრამის ფარგლებში, შეირჩა კიდევ 8 მედია-საშუალება მთელი საქართველოს მასშტაბით (მათ შორის, "ახალი გაზეთი"), რომელთათვის მსოფლიო პრესის ასოციაციის ექსპერტთა ჯგუფი სპეციალურ პროგრამას "გაუმჯობესებული მენეჯმენტი და ბიზნესის განვითარების ინიციატივა" განახორციელებს.
ცხადია, მედია ბიზნესის განვითარება და მისი მდგრადობა კვლავ რჩება საქართველოში მთავარ გამოწვევად, მაგრამ არანაკლებ მნიშვნელოვანი პრობლემაა საკადრო რესურსის დეფიციტი. უახლოეს პერიოდში, "ახალი გაზეთი" გეგმავს სტუდენტების სტაჟირების კურსის დანერგვას. ისინი მოამზადებენ ნიუსებს, სტატიებს, ფოტო და აუდიო-ვიდეო რეპორტაჟებს, რომლებსაც ატვირთავენ გაზეთის ვებ-გვერდზე www.akhali-gazeti.ge. ვებ-გვერდზე ამუშავდება ბლოგების განყოფილება, რაც ხელს შეუწყობს ახალი კადრების ხედვების პოპულარიზაციას და გაზრდის ინტერაქტივს მკითხველებთან და ონლაინ მომხმარებლებთან. სწორედ სტუდენტების გააქტიურებისა და მათი ინიციატივების მხარდასაჭერად, "ახალი გაზეთი" უკვე წლებია, სპეციალურ კონკურსს "სტუდენტური ინიციატივა" ახორციელებს.
მიუხედავად ამ ყველაფრისა, მედია ვერ განვითარდება, თუ მან დაკარგა თავისი მთავარი ფუნქცია - იყოს მედიატორი ხალხსა და ხელისუფლებას შორის, მიაწოდოს მკითხველს ობიექტური და ამომწურავი ინფორმაცია. საქართველოში, ბოლო პერიოდში, განსაკუთრებით შეიზღუდა საჯარო ინფორმაციის ხელმისაწვდომობა მედიისთვის. თუ ადრე ამ მიმართულებით ძალოვანი უწყებები გამოირჩეოდნენ, ბოლო პერიოდში, უკვე ადგილობრივი თვითმმართველობები და განათლების დაწესებულებებიც დაიხურა. ამ პრობლემის გამო, 3 მაისს, მსოფლიო პრესის თავისუფლების დღეს, საქართველოში მოქმედმა 16 რეგიონულმა გაზეთმა ერთობლივი აქცია მოაწყო სლოგანით "მოგვეცით საჯარო ინფორმაცია". აქციის ფარგლებში, მონაწილე ყველა გამოცემამ პირველი გვერდი ცარიელი ფურცლებით გამოუშვა. თუმცა, მიუხედავად მცდელობისა, ხელისუფლების მხრიდან, ამ აქციას ადეკვატური რეაგირება არ მოჰყოლია. საჯარო ინფორმაცია კვლავაც მიუწვდომელი რჩება.
და ბოლოს, "ახალი გაზეთი" კვლავაც საკუთარი პროფესიული ღირსების ერთგული რჩება და ამიტომაც, საქართველოს ჟურნალისტური ეთიკის ქარტიის ერთ-ერთი ხელმომწერია. ხოლო გაზეთის რედაქტორი, მაია მეცხვარიშვილი ამავე ქარტიის საბჭოს წევრად იქნა არჩეული.
ასე რომ, მომავალი სეზონიდან, ანუ სექტემბრიდან "ახალი გაზეთი" განახლებულ ფორმატს, ბევრ საინტერესო რუბრიკასა და ობიექტურობისა და სიმართლის სადარაჯოზე დგომას გპირდებათ.
ია ბობოხიძე
No comments:
Post a Comment